Home

Analisa e Maneho Energetico riba Aruba

Details

Category: Uncategorised

Published on Monday, 31 October 2011 00:09

Written by ing. Henry de Cuba

Hits: 147

Nos por a experiencia e iniciativanan recien di gobierno pa re-organiza, re-structura WEB, ELMAR cu ta responsabel pa e produccion y distribucion di awa y coriente. E centralisacion di e companianan aki lo tin su consequencianan positivo den e maneho di nan administracion y funcionamento en general.

Mescos cu WEB N.V. tin su departamento cu ta suministra y administra awa, e coriente tambe por wordo suminstra y administra. E manera aki e overhead ta menos costoso y ta economisa riba e servicionan. E funcionamento lo ta mas eficiente. Mester studia e alternativa aki, cu por yuda na economisa.
E punto cu nos kier trece dilanti ta cu independiente di con e sector energetico wordo re-organisa, e factor mas importante y mas grandi ariba nos prijs di awa y coriente ta e continuacion di importacion di productonan petrolero caro. Esaki kiermeen cu nos mester bira mas independiente posibel di petroleo, nos mester busca otro manera pa produci nos energia unda cu nos ta uza e recursonan natural cu nos tin y unda cu nos no mester competi pa importa energia. Nos no mester ta adicto na azeta! Nos Isla ta hopi vulnerabel pa un desaroyo cu ta tumando lugar riba tereno mundial.

Aruba ta bendishona cu su clima. E condicionan na Aruba ta adequado pa desaroya diferente tipo di energia alternativo. Un clima cu un solo fuerte y un biento fresco y continiuo di pariba ta adequado pa produci energia solar of energia di biento. Banda di esaki na Aruba nos ta produci un gran cantidad di sushi domestico y commercial cu ta adecuado pa por wordo converti den energia thermico. Si nos wak rond, Aruba ta rondona pa lama, tur e olanan cu ta forma ta contene energia cu por wordo usa pa produci electricidad. E cantidad di awa sushi cu nos ta produci den nos septic tank den cura, por wordo usa pa produci biogas. Nos mester realisa cu tin sufficiente alternativa disponibel pa por bira menos dependiente di productonan petrolero importa cu ta costa nos isla chiquito hopi placa.

Contrario cu expreshon duna dor di director di ELMAR N.V. cu "energia alternativo ta mucho caro pa implementa aki na Aruba". Si nos wak rond mundo con paisnan ta reacciona ariba e prijsnan halto di petroleo, incluyendo Merca cu ta adicto na petroleo, a realisa cu nan mester desaroya energia alternativo.
Mas y mas hende ta realisa cu aunque e costo inicial pa instala un parke di biento, un systema di solo, un planta di gasificacion of un planta di waste-to-energy ta halto, on the long run e ta paga su mes back. A lo largo tambe e lo duna beneficionan financiero y ta cumpli cu diferente exigencianan riba tereno ambiental, energia limpi, diversificacion technologica y dependisacion energetico.

Islanan chiquito manera Aruba cu ta usa masha tiki coriente en comparacion cu otro paisnan, tin tur e posiblidadnan pa usa e forzanan natural di energia alternativa pa produci gran parti di nan coriente y awa. Ta logico cu cambionan den custumbernan convencional lo y ta trese resistencia cu a lo largo mester wordo surpasa pa systemanan mas avansa y sostenibel.

Bonaire ta un ehempel cu ta bai riba 90% cu energia alternativa, esta energia di biento, cu backup di dos dieselmotor Wartsila. Cu esakinan ta wordo subsidia parcialmente no ta indica cu nan no ta efficiente. Tin diferente factornan cu mester wordo conta y desconta pa yega na e efficiencia general di installacionan asina.

Nos ta apoya e iniciativa di WEB pa conscientisa nos pueblo den e manera cu nos ta consumi awa y coriente. Mehoracion di eficiencia energetico tambe ta un manera hopi bon pa baha costonan di awa y coriente pa luna. Dor di cumpra apparatonan (manera frigidair, airco of luz) cu ta gasta menos energia bo por spaar coriente, dor di cumpra auto cu ta gasta menos gasolin por spaar placa, otro maneranan ta pa ta consiente di paga luz, computer of televishon ora cu bo no ta uze. Asina bo ta usa menos y paga menos.

Pero na mesun momento WEB N.V. mester bai focus mas riba e industria turistico, cu ta ocasiona un presion grandi riba e suministro di awa y coriente cual na su turno ta exihi expansion costoso di nos planta di awa y coriente. Tambe ta asina cu e turista ta gasta mucho mas cu e habitante local. Aki e “waste of energy” ta tuma lugar.

Nos como Comission di Energia di RED ta sigura nos pueblo cu tin alternativanan cu bon potencial aki na Aruba cu ta merece mas attencion pa asina desaroya energia limpi, sostenibel y mas barata.

Na nomber di E-com, Comision di Energia y Medio Ambiente RED

ing. Henry de Cuba

• < Prev